बटलरने एकहाती केला भारताचा गेम?

buttler single handedly ruin indias game भारत आणि इंग्लंड यांच्यातील पाचव्या टी-२० सामन्यात इंग्लंडच्या फलंदाजांनी भारतीय गोलंदाजांवर वर्चस्व गाजवत धावांचा पाऊस पाडला. रोझ बाऊल स्टेडियमवर झालेल्या या सामन्यात प्रथम फलंदाजी करणाऱ्या इंग्लंडने २० षटकांत ३ बाद २५७ धावांचा भक्कम डोंगर उभारला. त्यामुळे सामना जिंकण्यासाठी भारताला आता २५८ धावांचे आव्हान पेलावे लागणार आहे.

 

 

इंग्लंडच्या डावात यष्टीरक्षक-फलंदाज जोस बटलरने अप्रतिम फलंदाजी करत अवघ्या ६४ चेंडूंमध्ये १३१ धावांची स्फोटक खेळी साकारली आणि शतक झळकावले. त्याला हॅरी ब्रूकचीही दमदार साथ लाभली. ब्रूक ९५ धावांवर नाबाद राहिला. या दोघांच्या भागीदारीमुळे इंग्लंडने भारतासमोर मोठे लक्ष्य उभे केले. या सामन्यात भारताचा कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला होता. हवामान आणि खेळपट्टीचा विचार करून हा निर्णय घेतल्याचे त्याने सांगितले. गेल्या काही सामन्यांतील गोलंदाजीच्या अनुभवाच्या आधारे संघाने आधी गोलंदाजी करण्याचा पर्याय निवडल्याचेही अय्यरने स्पष्ट केले.

 

भारताने या सामन्यासाठी अंतिम अकरामध्ये दोन बदल केले. वॉशिंग्टन सुंदरच्या जागी सूर्यांश शेडगेला संधी देण्यात आली, तर वैभव सूर्यवंशीच्या जागी संजू सॅमसनचा समावेश करण्यात आला. संघाला अधिक पर्याय उपलब्ध व्हावेत, या उद्देशाने हे बदल करण्यात आल्याचे अय्यरने नाणेफेकीवेळी सांगितले. दुसरीकडे, इंग्लंडने आपल्या अंतिम अकरामध्ये एक बदल केला.