मी आत्महत्या करणार होतो
काळात गोविंदाने केला होता जीवन संपविण्याचा विचार?
Total Views |
मुंबई
govinda बॉलिवूड अभिनेता गोविंदाने आपल्या आईच्या निधनानंतरच्या आयुष्यातील अत्यंत कठीण काळाबद्दल नुकताच धक्कादायक खुलासा केला आहे. आई निर्मला देवी यांच्या निधनानंतर आपण मानसिकदृष्ट्या पूर्णपणे खचून गेलो होतो आणि त्या काळात आत्महत्येचे विचारही मनात आल्याचे गोविंदाने सांगितले. पॉडकास्टमध्ये बोलताना त्याने आयुष्यातील हा अत्यंत भावनिक प्रसंग उलगडला.
गोविंदाची आई निर्मला देवी यांचे १५ जून १९९६ रोजी वयाच्या ६९व्या वर्षी निधन झाले. आईशी गोविंदाचे अतिशय घट्ट आणि भावनिक नाते होते. त्यामुळे त्यांच्या निधनाचा त्याच्यावर मोठा मानसिक परिणाम झाला. आई गेल्यानंतर आपण इतका दुःखी झालो होतो की, ‘सगळं संपलं आहे’, अशी भावना मनात निर्माण झाली होती, असे त्याने सांगितले.आईच्या निधनानंतर गोविंदा नर्मदा नदीजवळ गेला होता. आईला पुन्हा भेटता येईल, या भावनेतून तो नदीच्या पाण्यात पुढे जाऊ लागला. त्या वेळी त्याच्या मनात आत्महत्येचा विचार काही प्रमाणात आला होता, अशी कबुली त्याने दिली. मात्र, या घटनेकडे आपण आत्महत्या करण्याचा प्रयत्न म्हणून पाहत नसल्याचेही गोविंदाने स्पष्ट केले.
गोविंदाने सांगितले की, तो आपल्या आईशी अत्यंत भावनिकरित्या जोडलेला होता आणि तिच्यावर त्याचे खूप प्रेम होते. आईच्या निधनानंतर निर्माण झालेल्या दुःखामुळे त्या क्षणी त्याला आयुष्य निरर्थक वाटू लागले होते. नर्मदा नदीतील तो प्रसंग त्याच्या आयुष्यातील अत्यंत निर्णायक क्षण ठरला.याच वेळी राम कुंडल नावाच्या एका पुजाऱ्याचे गोविंदाकडे लक्ष गेले. त्यांनी गोविंदाला नदीत पाहून आवाज दिला. त्यानंतर ते त्याच्याजवळ गेले आणि त्याला नदीतून बाहेर काढले. या घटनेनंतर आपण जे करत होतो ते चुकीचे असल्याची जाणीव गोविंदाला झाली. त्याला आपल्या मुलांसाठी जगण्याचा नवा उद्देश मिळाला आणि ‘मला माझ्या मुलांसाठी जगायचं आहे’, हा विचार त्याच्या मनात दृढ झाला.
आईच्या निधनानंतरच्या या मानसिक धक्क्यातून पूर्णपणे सावरण्यासाठी गोविंदाला १५ दिवसांपेक्षा जास्त काळ लागला. या अनुभवाने त्याच्या आयुष्याकडे पाहण्याचा दृष्टिकोनही बदलला. चित्रपट, अभिनय आणि स्टारडम यांच्याकडे पाहण्याची त्याची दृष्टी या घटनेनंतर वेगळी झाल्याचे त्याने सांगितले.
गोविंदाच्या या आठवणींमधून त्याचे आईसोबत असलेले भावनिक नाते आणि तिच्या निधनानंतर त्याने अनुभवलेला मानसिक संघर्ष स्पष्टपणे समोर येतो. आयुष्यातील त्या कठीण प्रसंगातून बाहेर पडताना आपल्या मुलांनी आपल्याला जगण्याची नवी दिशा दिली, असे त्याच्या कथनातून दिसून येते.