गुटख्याच्या अवैध व्यवसायावर मोठी कारवाई

jalna gutkha raid जालना जिल्ह्यात अवैध गुटखा व्यवसायाविरोधात अन्न व औषध प्रशासन (FDA) आणि पोलिसांनी संयुक्तपणे धडक कारवाई केली. राजूर परिसरात करण्यात आलेल्या या कारवाईत मोठ्या प्रमाणात अवैध गुटखा तसेच त्याच्या वाहतुकीसाठी वापरण्यात येणारी चार वाहने जप्त करण्यात आली. या कारवाईत एकूण 1 कोटी 35 लाख 30 हजार रुपयांचा मुद्देमाल हस्तगत करण्यात आल्याची माहिती पोलिसांनी दिली.

 

 

पोलिसांच्या माहितीनुसार, कारवाईदरम्यान तब्बल 95 लाख 30 हजार रुपये किमतीचा अवैध गुटखा जप्त करण्यात आला. गुटख्याची वाहतूक करण्यासाठी वापरण्यात येणारी चार वाहनेही पोलिसांनी ताब्यात घेतली असून, या वाहनांची एकूण किंमत सुमारे 40 लाख रुपये आहे. त्यामुळे जप्त करण्यात आलेल्या गुटख्यासह वाहनांची एकूण किंमत 1 कोटी 35 लाख 30 हजार रुपयांवर पोहोचली आहे.

या प्रकरणी पोलिसांनी दोन आरोपींना अटक केली असून, त्यांच्याविरोधात गुन्हा दाखल करण्यात आला आहे. अवैध गुटख्याचा पुरवठा करणाऱ्या सप्लायर कंपनीविरोधातही अन्न व औषध प्रशासन आणि पोलिसांकडून गुन्हा नोंदवण्यात आला आहे.

जिल्ह्यात अवैध गुटखा विक्री आणि वाहतुकीला आळा घालण्यासाठी प्रशासनाकडून कारवाई सुरू असताना राजूर परिसरातील ही मोठी कारवाई महत्त्वाची मानली जात आहे. मोठ्या प्रमाणात गुटखा आणि वाहतुकीची वाहने जप्त झाल्याने अवैध गुटखा व्यवसाय करणाऱ्यांमध्ये खळबळ उडाली आहे.